- డిస్మాంటిల్ చేయాలని పంచాయతీరాజ్ ఏఈ ఆదేశాలు
- డీపీఓకు వినతిపత్రం అందజేసిన నెల్లిపాక బంజర సర్పంచ్ ముండ్రు రామకృష్ణ
అశ్వాపురం, జూలై 20(సింగిడి): (Bhadradri) అశ్వాపురం మండలం నెల్లిపాక బంజర గ్రామపంచాయతీకి అత్యవసరంగా నూతన గ్రామపంచాయతీ భవనాన్ని మంజూరు చేయాలని కోరుతూ గ్రామ సర్పంచ్ ముండ్రు రామకృష్ణ సోమవారం జిల్లా కలెక్టరేట్లో నిర్వహించిన గ్రీవెన్స్ డే కార్యక్రమంలో జిల్లా పంచాయతీ అధికారిణి (డీపీఓ)కు వినతిపత్రం సమర్పించారు.ఈ సందర్భంగా సర్పంచ్ ముండ్రు రామకృష్ణ మాట్లాడుతూ, ప్రస్తుతం గ్రామపంచాయతీ కార్యాలయంగా ఉపయోగిస్తున్న భవనం 1970 సంవత్సరంలో ఉమ్మడి ఆంధ్రప్రదేశ్ రాష్ట్ర హోం శాఖ మంత్రిగా ఉన్న జలగం వెంగళరావు ప్రారంభించిన భవనమని తెలిపారు. ఆనాటి నిర్మాణ విధానంలో డంగ్ సున్నంతో నిర్మించబడిన ఈ భవనం కాలక్రమేణా పూర్తిగా శిథిలావస్థకు చేరుకుందని పేర్కొన్నారు.ప్రస్తుతం భవనం గోడలు పగుళ్లు ఏర్పడి, పైకప్పు బలహీనపడటంతో ఎప్పుడైనా ప్రమాదం సంభవించే పరిస్థితి నెలకొందని తెలిపారు. భవనం శిథిలావస్థలో ఉండటంతో ప్రజాప్రతినిధులు, సిబ్బంది, గ్రామస్తుల ప్రాణాలకు ముప్పు ఏర్పడే అవకాశముందని ఆందోళన వ్యక్తం చేశారు.ఈ నేపథ్యంలో పంచాయతీరాజ్ శాఖ అసిస్టెంట్ ఇంజనీర్ (ఏఈ) భవనాన్ని పరిశీలించి, అది వినియోగానికి అనుకూలంగా లేదని నిర్ధారించి, డిస్మాంటిల్ చేయాలని ఇప్పటికే ఆదేశాలు జారీ చేసినట్లు వినతిపత్రంలో పేర్కొన్నారు.అయితే పాత భవనం స్థానంలో కొత్త భవనం లేకపోవడంతో గ్రామపంచాయతీ పరిపాలన తీవ్ర ఇబ్బందులకు గురవుతోందన్నారు. గ్రామసభలు, పాలకవర్గ సమావేశాలు నిర్వహించడానికి తగిన స్థలం లేకపోవడంతో పాటు, పంచాయతీ కార్యాలయానికి వచ్చే ప్రజలకు కనీస సౌకర్యాలు కూడా కల్పించలేని పరిస్థితి ఏర్పడిందని తెలిపారు.
ప్రభుత్వ సంక్షేమ పథకాల అమలు, ధ్రువపత్రాల జారీ, పన్నుల వసూళ్లు, ప్రజల సమస్యల పరిష్కారం వంటి నిత్య పరిపాలనా కార్యక్రమాలు కూడా ఇబ్బందికరంగా మారాయని వివరించారు.గ్రామీణ ప్రజలకు మెరుగైన, పారదర్శకమైన పాలన అందించాలంటే అన్ని వసతులతో కూడిన ఆధునిక గ్రామపంచాయతీ భవనం అత్యంత అవసరమని ఆయన పేర్కొన్నారు. నూతన భవనం నిర్మాణానికి అవసరమైన నిధులు మంజూరు చేసి, పరిపాలనా అనుమతులు మంజూరు చేయాలని డీపీఓను కోరారు.వినతిపత్రాన్ని స్వీకరించిన జిల్లా పంచాయతీ అధికారిణి సమస్యను సానుకూలంగా పరిశీలిస్తామని, సంబంధిత ఉన్నతాధికారుల దృష్టికి తీసుకెళ్లి నిబంధనల మేరకు అవసరమైన చర్యలు చేపట్టేందుకు కృషి చేస్తామని హామీ ఇచ్చినట్లు సర్పంచ్ తెలిపారు.గ్రామాభివృద్ధికి గ్రామపంచాయతీ కార్యాలయం కేంద్రబిందువుగా ఉండే నేపథ్యంలో, దాదాపు ఐదు దశాబ్దాల క్రితం నిర్మించిన పాత భవనం స్థానంలో నూతన భవన నిర్మాణానికి ప్రభుత్వం తక్షణమే చర్యలు తీసుకోవాలని నెల్లిపాక బంజర గ్రామ ప్రజలు కోరుతున్నారు.
Read Now: https://singidinews.com/all-speculations-quashed-by-rohit-sharma/
